" من لم يذق مر التعلم ساعة , تجرع ذل الجهل طوال حياته "

السلام عليكم ورحمة الله وبركاته ..

أنا الطالبة ساره عون ..أنهيت سنتي الأولى في المسار الصحي وأنا اليوم أدون لكم تجربتي خلال هذه السنة الطويلة , قد يكون ما كتبته مختلفاً عن البعض ولكني حاولت أن أكون صادقة فيما اكتب , لن ألون لكم الحياة باللون الوردي ولا اللون الرمادي أنتم من سيختار اللون الذي سيغطي عالمكم خلال سنتكم القادمة

ملاحظة:1_ مدونتي طويلة جداً , ارجو أن لا تشعر بالملل.

2_ هذه التجربة تمثلني شخصياً وجميع ما كتبته ينطبق علي وقد تكون مختلفاَ لكن خذ منها ما يناسبك .

ماقبل الدراسة :

قبل ما يقارب عام من الآن , تلقيت رسالة قبولي في المسار الصحي في جامعة الدمام كرغبة أولى .. وهنا بدأت ارسم الطريق لأحلامي التي ستتحقق قريباً .. لماذا المسار الصحي بالتحديد ؟ لم أستغرق كثيراً من الوقت في التفكير لاختيار التخصص الجامعي , اذ كنت أنا ساره شغوفة في أن يكون لي تأثيراً في الناس من حولي .. وكيف أحقق ذلك التأثير ؟ العالم هذا عبارة عن حياة .. والحياة تعني الصحة والصحة من أعظم النعم التي من الله بها علينا لذا كان خيار المجال الصحي هو الأمثل لصنع أثر كبير لا ينساه لي العالم من حولي بعد مماتي . 

اتتمت الإجراءات الالكترونية وكانت سهلة وطبعت الاشعار وصرت طالبة رسمياً..

بعد ذلك بدأت رحلة التفكير بما سيحدث بعد القبول , سنة جديدة ؟ , أصدقاء جدد ؟, بيئة جديدة ؟ , تحول كبير من الدراسة الثانوية للجامعية , فكرة تروح وفكرة تجي .. ولكن كان ذلك كله بلا هدف إن كنت تقرأ مدونتي الآن فنصيحتي الكبرى لك أن تنسى هذه الأمور وتستعد نفسياً لسنة التحديات ويا حبذا لو تسعى للتطوير لغتك الإنجليزية بشكل أكبر ..

كيف أطور لغتي ؟

هناك عدة طرق تقدر تطور فيها لغتك في فترة ماقبل الدراسة .. القراءة أهم نقطة ممكن تكسب منها فوكاب جديد , فعلاً القراءة طريقة فعالة .. مو لازم تشتري كتب تقدر تقرأ من النت .. الخطوة الثانية وهي مهمة : الاستماع عن طريق مقاطع باليوتيوب والأفلام .. وبهذه الطريقة تطبق الفوكاب الا اخذته من القراءة .. أما الكتابة وهي عقدتي الازلية ولكن مواقع النت تعطيك طرق الكتابة الصحيحة واستفدت منهم جداً في فترة الدراسة ..

وهذه بعض البرامج المفيدة للسننغ وفيها لابات وتقدر تسولف معاهم جداً حلوين" من احدى الزميلات في قروب الفيس بوك " :

اسعى انك تتطور مهارات اللغة الإنجليزية الأربع" اللسننغ والسبيكنغ والرايتنغ والريدنغ " قبل لا تدخل السنة التحضيرية عشان تقدر تتغلب على مادة الإنجليزي العام .

في مواقع تعمل اختبارات للريدنغ واللسننغ تقدر تدخلهم وتختبر نفسك .. الرايتنغ تكتسبه ويتطور مع الوقت .. السبيكنغ مهارة أيضا مكتسبة من ممارسة اللغة

بعد هذا الشيء تلقيت رسالة الفحص الطبي :

فحص سهل مافيه شيء بس مشكلته انه كان برمضان وكنا صيام ..رحت المستشفى مع ابوي وهناك قلنا لهم انه جايين للفحص الجامعي وعلمونا وين نروح .. طبعاً كنت جايبة صور شخصية معاي لانه مطلوب واظن صورة للجواز وبطاقة الأحوال وبطاقة العائلة .. عطوني رقم وانتظرت لدوري .. دخلت على الدكتورة وعملت فحص النظر بعدين سحبت دم ودخلت على دكتورة ثانية سألتني بعض الأسئلة : عن التاريخ المرضي لي مثلاً أمراض الدم الا عندي وهل سويت عملية جراحية من فترة .. كان شيء عادي وما فيه شيء بس انتبهوا لو في شيئ مطلوب تاخذوه معاكم.

 بعدها اختبار تحديد المستوى للانجليزي :

اختبار بسيط مافيه شيء ولا تذاكرون له .بيقولون لك سوي نفسك غبي ولا تتفلسف عشان لا تدخل أدفانس .. أنا أقولك حل الا

تعرفه ولا تتغابى واعطي نفسك مستواك , أني حليته كأي اختبار وحطوني بمستواي " متوسط"

اختبرنا مثل قياس اختياري ونظلل بعدين بداية الدراسة اختبرنا تكملة له وهو اختبار سبيكنغ : كان بعد ظهور المستويات "advance ,intermediate, beginner"  .. رحنا لشعبتنا كانو حاطين الأسماء وأماكن الشعب بعدين بالأسماء تنادينا المس ونعمل الاختبار ..

ممكن تتوترون شوي وهذا طبيعي .. سألتني  المس : تكلمي عن نفسك .. تكلمي عن مدينتك وليش تحبينها .. أي أهم عيلتك او الفلوس .. ومن هالاسئلة ..وغالباً ما يأثر على مستواك لان تم تحديده.

بداية الدراسة :

بعد اختبار القبول بأسبوع كانت بداية الدراسة .. نداوم في الأسبوع الأول يوم واحد فقط " اليوم التعريفي" يوم مهم ما انصح أحد إنه يسحب عليه سواء كان الحضور إلزامي أو غيره ..

عطونا كتيبات تعريفية وأشياء مهمة للتسجيل .. وسولفوا شوي وجابوا بنات يتكلموا عن تجربتهم .. وأخيراً عملوا لنا أقسام تعريفية لتخصصات المسار الصحي .

 تسجيل المواد :

بتشوفوا الطريقة بالكتاب اللي راح يعطوكم وياه وحتى الإيميل الجامعي كيف تفعليه وهالأمور ..

مضى الإسبوع ...

وبدأت الدراسة ..

كانت بداية صعبة ومختلفة وتغير جذري في حياتي .. طول الدوام الا ما اعتدت عليه .. المحاضرات بالانجليزي وبديت أحس بالضياع وفقدان الأمل بالنجاح أو الوصول للهدف ..لكن .. شوي شوي حسيت بتقبل الأمر ..

الناس الا وصلت ونجحت مو أحسن مني .. جميعاً نملك الفرصة وجميعاً نستطيع صنع تغير في ذواتنا قبل المجتمع الا حولنا .. البدايات دائماً تكون صعبة .. لازم تضغط على نفسك تبتعد عن السلبية لأنها فعلاً تقتل كل شيء داخلك ..علمتني السنة التحضيرية انه السلبية توجد بشكل كبير في الأشخاص وفي الأشياء وأنه يوجد من يعمل على نشر روح التخاذل والتشاؤم ولكن ..محاولة تجاوز السلبية قدر المستطاع ستمنحنا القدرة على الانتصار في الأعمال وفي الحياة .

الإيجابية والتفاؤل ليست مصطلحات تردد وحسب ..

يقول الدكتور معن السلطان في كتابه بين الثنايا :

" التفاؤل ظاهرة صحية قبل كل شيء , تزيل الهموم وتمنح الإنسان القدرة على الخوض والانتصار في الأعمال المقدم عليها ".

المواد الدراسية :

تقسيم الدرجات يختلف من سنة لسنة فما بتكلم عنه .." صديقتي فاطمة تكلمت في مدونتها بالتفصيل"

درسنا خلال السنة 11 مادة بعضهم فصلي وبعضهم سنوي ..

المواد السنوية :

الكيمياء :

بدأت فيها لأنها مادة جميلة والقسم لطيف ومتعاون ..تجميع الدرجات فيها سهل ولكن مو معناته سهل انه ماتعطوها حقها لا ذاكروها عدل واضمنوا الA+ ,عليها 3 كردت في المعدل , الميد ترم الأول كان سهل جداً ذاكرو له ززين واضمنوا ال 15 ولكن انتبهوا تقعوا في اغلاطنا وتهملوا الميد الثاني وتقولو الكيمياء لعبتنا ..في التحضيري لازم تعطي كل اختبار قيمته وتعتبره فرصة لك .. مذاكرة المادة من السلايد .. افهموا السلايد عدل عدل وبعدين عندكم أسئلة الكتاب تدربوا عليها بس يعني مو الكل كان يحلهم .. اذا ذاكرتوا السلايد عدل مرا هالمادة بتكون بسيطة + انتبهوا انكم تهملوا اخر السنة في قسم الاورقانك مهما انشغلتوا لازم تراجعو وتركزو مع المحاضرة " دكاترة الكيميا حلوين" يعني لو بالسيارة اقرو المحاضرة بس لا تهملوا الاورقانك لان حفظ .. مستوى الاختبارات في الميد ترم سهل الى متوسط .. الفاينل كان صعب شوي ويبغى له .. لكن " تثق بربك".

لاب الكيمياء :

أحلى وأطلق لاب بالحياة والله ..

اختبرنا اول السنة اختبار من 2 للأدوات وتعليمات السلامة وهذا كان اصعب شيء عندنا لان مابعد نقدر نحفظ بالانقلش وكذا لكن عدا واغلبنا جاب 2 من 2

بعدين بقية الاختبارات كان المنول مفتوح وتجارب بسيطة ونجاوب ..

حلووو هالمعمل جججداً.

الأحياء:

مادتي الجميلة الممتعة .. حب التحضيري ذي , كنت استمتع فيها جد والله , أحس بمتعة وأني اتعرف على أجزاء جسمي من الخلية مروراً بالانسجة وكل جهاز يخدمني لأبقى حية ..عليها خمس كريدت وترفع المعدل , الكل كان يقول ذاكرو الكتاب وكنت اذاكره بالميدترم لوجود الوقت , مذاكرة الكتاب ممتعة .. لكن بالفاينل ما فتحت الكتاب لان السلايدات تكفي بالنسبة لي ماعدا كم تشابتر حسيت انه غير وافي فذاكرت منه .. أسئلة الميدترم من متوسط لصعب بس الفاينل كان حلو وواضح بس عيبه الكمية الضخمة .. ذاكروها بحب وبتحبكم ..لا تستصعبوها وتقولو واجد ومانقدر  ولا كل هالكمية بنذاكرها .. ركزوا ع الرسومات تركيييز " يجي من تفاصيلها ".

لاب الأحياء :

كنت ماحبه لان الا تعطينا بس تهدر ولا ادري وش تقول كنت أنام او افكر بويش اسوي لما ارجع البيت لان كان من 3-5 وتعب .." لا تسسو زيي " بعدين نرسم العينات ونشوفها " كنت ارسم خرابيط بس طلعوا بالفاينل زينين " كنصيحة من أخت ليكم " هذا المعمل بسيط لكن غلطنا انه اهملناه وما فتحناه الا بالفاينل فكان ضغط علينا ". فالي عليكم انه تخصصوا ليكم جزء من الوقت وتذاكروه .. في ملخصات للاب عملوهم زميلاتي وكانو مفيدين ذاكرو الاب بشكل دوري منهم عشان تضمنوا الفل مارك لأنها سهله وحتى لو ماذاكرتو بشكل دوري تقدرو تجيبوا .. بس كل شيء لازم تتعب عليه عشان توصل .

الإنجليزي العام :

المادة ذات النصيب الأكبر من المعدل , إياكم وأهمالها او الاستهانة فيها .. الكل قال سهل تجيب فيها A+ هو عادي لكن .. هذا القسم غير واضح وماحب أتكلم عنهم حقيقةً لان تدريسهم فاشل باستثناء مس وحدة علمتنا وفادتنا .. بالإضافة إلى إن هالمادة مذاكرتها سهلة بس قرمر وفوكاب والباقي يعتمد على لغتك وسبق كتبت ليكم بالبداية كيف تهزم هالمادة وتجيب فيها عالي, ذاكرو الفوكاب عدل والقرمر شوفو كم كويز بالنت عشان تصيرو فاهمين اما الباقي فمو لازم تدربون عليه وانتهزوا كلاسات هالمادة بتطوير نفسكم باللغة لو كانت المس تسولف ولا تستحوا من انكم تتكلمو " مثليي "شاركو وحبوا اللغة وبعد لو كانت تطفش جيبوا شيئ واقروه او اجلسوا اقرو الريدنغ بالكتاب .. كنت اسوي كذا اذا مليت .

الاختبارات من متوسط ل صعب " بالنسبة لي "..

كلها اختياري .. قرمر وفوكاب وريدنغ ولسننغ ..

وفي رايتنغ يجيبوا موضوعين ونختار ونكتب وهم يحددوا كم يبغو ونوع الايساي .

السبيكنغ .. في الميدترم كان جماعي ولكن الفاينل والميد الثالث كان فردي .. الأسئلة من مواضيع الوحدات وفي البعض يجيبوا أشياء خارجية .

الكويزات : كانو ينزلو لنا كويزات بالبلاك بورد ونحلهم مع بعض ..

الحضور : احنا ما حسبوا لنا الغياب وعطوا الجميع درجة الحضور اهم شيء ماعدا الساعات المسموحة ." بس يعني احضروا تستفيدو ><".

المواد الفصلية :

الفيزياء :

فصلية وأخذناها بالفصلين الدراسين .. ياربي محتارة وش اكتب ليكم في هالمادة .. كانت عقدتي وسببت لي احباط في الترم الأول لكن .. قدرت اهزمها في الترم الثاني واجيب عالي وانتو بعد بتقدرو تهزموها وتهزموا كل دكاترة الفيزيا الا يحاولو يتحدوكم انكم تجيبوا الدرجات .. من أول لحظة بالسنة حطوا ببالكم أن ماتضيعوا درجات في هالمادة وذاكروها عدل من الترم الأول .

كيف أذاكر فيزياء :

السلايدات هي الأساس " ذاكروهااا عدل مرا " وبعدين حلوا أسئلة الكتاب وافهموها والتوتوريالز بعد .. وماله داعي تذاكرو أشياء من النت "أسئلة ".. كنت اسوي كذا وما استفدت .. السلايدات والتوتوريالز واسئلة الكتاب هم اهم شيء وافهممموا .. لا تخلوا سلايدة تمر مافهمتوها .. اسألوا الدكاترة .. دوروا بالنت .. اليوتيوب .. قناة خان اكاديمي .

لاب الفيزياء :

كنا ندخل المعمل ونسوي التجربة ونكتب البيانات بعدين تصلح لنا الدكتورة وفي فاينل الفيزياء كان الفاينل نظري يعني هذه التجارب تذاكرونها من المنول. 

الحاسب :

الفصل الدراسي الأول ..

البعض يعتبرها سسهلة جداً..

لكن اني كنت ما أحب الحاسب واكرهه ومتى ما كرهت الشيء يأثر هذا على مستواك فطبعاً ماجبت عدل في الميد الأول بعدين وعيت على نفسي في الفاينل وجبت .. في البداية يمكن ماتحبوها لان القسم الأول كله نظري واشياء حفظ ورموز يجي منها .. نذاكر في هالمادة الكتاب ممكن تتعبوا بالترجمة شوي بس اصبروا على الشيء.. الفصل الأول هو اصعب شيء بعدين العملي عادي لكن الاكسس يبغى له .. أسئلة هالمادة مو صعبة لكن ذاكروا شوي شوي ويعدي زي مابيعدي غيره .

أسئلة الميد ترم عملي ونظري

أسئلة الفاينل نظري اختياري مع وجود الجهاز حق تجربوا الأشياء العملية.

كان في مشروع لاخر فصل .. المس ترسل لكم التفاصيل وتسوونه على هالاساس .. اذا مسكم طيبة بتساعدكم اما احنا مارضت تشوفه الا لما يستوي لكن الحمد لله اخذنا ال 10 .

في كويزات بعد في هالمادة .. الكويزات كانت بسيطة اذكر .

العقيدة الإسلامية :

الفصل الدراسي الأول ..

مادة حليوة وسهله والقسم متعاون جداً ..

كلاس واحد في الأسبوع مدته ساعتين وعليها 2 كردت في المعدل ..الA+فيها سهله ..وحفظنا نصف جزء عم  .. كانت سهله بالنسبة لي يمكن لان احب الحفظ وما عندي مشكلة معاه. في ميدترم من 25 بسسسيط والفاينل بعد اذا داكرتوا زين بعد بسيط الفاينل من 50 و10 للمشاركة " شاركو شوي " و10 لحفظ القرآن و10 للحضور و10 لمشروع قيمي ..في القرآن نحفظ نصف جزء عم والترم الثاني باقيه "اهم شيء الحفظ بالحركات "وكانوا الدكتورات متعاونين.

قيمي شيء حلو حقيقةً .. كنا نمسك قيمة أخلاقية ونفعلها للمجتمع .. كنت استمتع فيه جداً ..

في مادة العقيدة فعلنا قيمة الصدقة .. وزعنا أوراق فيها سعر مدفوع على العاملات

وهذه صور من شغلنا :

مهارات البحث والتعلم  :learning and researching skills

هذه المادة كانت بالانقلش عندنا لأول مرة ..عليها 2 كردت في المعدل ..

الكتاب كان مبالغ في سعره وحجمه وحتى الكلام الا فيه كان لناس لغتهم اقوى منا وهذا واقع صراحةً ..كانت الكلاسات في وادي والكتاب في وادي .. السلايدات فيها حرفين .. قالو لنا عليكم كويز وجاتني حالة من الهيستيريا وقمت اذاكر الكتاب واترجم حرف حرف وكان طويل ومافيه حتى صور " أتمنى يغيروه ما حبيته " .

طبعاً بعدها اكتشفت انه هالمادة مو لازم تذاكري وتحفظي .. فصرت اقرأ فقط واذاكر السلايد ولان لغتي تطورت ماصرت احتاج اترجم بكثرة .. الفاينل كان اغلبه صح وغلط وهذا الا قهرني .. جزء الاختياري كان ابسط .

والكويزات سهله بس اختياري ..

البحث .. ما بتكلم عنه لان فعلاً كان شيء فاشل للقسم .. ما علمونا طريقته وطلبوه منا بوقت ججداً قصير وسالفته سالفة ناس سلمته مو كامل وناس كامل .. بس عطونا درجات كاملة عليه .

يعني هذه المادة جديدة واتوقع في سنتكم بيتطوروا من ناحية البحث ويمكن الكتاب او الشرح .. لكن للامانة استفدت منها في الفوكاب واجد.

الإنجليزي التخصصي :

الفصل الدراسي الثاني

عليها 3 كردت بالمعدل ..

مادة حليوة وسهلة بس طويل الفوكاب شوي مع المراجعة الدورية بتكون سهلة بإذن الباري .. طبعاً كنت احبها وألون الكتاب واستانس واني اذاكرها .. ممتعة والاسئلة تجي سهله بس القرمر شوي يصعبونه والريدنغ .فيها 3 اسايمنت اذا ماتغير على سنتكم .. والقرمر من الكتاب داخل معكم في الفاينل ..وبس مادري شقول بعد بس انو هالمادة لطيفة ولا تهملوها .. باختصار لا تهملو شيء بالمرة.

البدنية :

الفصل الدراسي الثاني ..

هالمادة كنت متحمسة ليها جداً .. اول كلاس تكسرت بعده أسبوع " ماعندنا لياقة " صارت الام الغد أسبوع .. تقسيمهم بالدرجات حلو المس بتقول لكم عليه .. مايحتاج تدربوا ولا شيء بالبيت اني ماكنت اتدرب وما كنت اعرف اسوي وطحت بالكلاس وجاني تمزق بإيدي وتأذيت منه أسبوعين .. وبسبب هالشيء نقصت بالعملي .. لكن بالفاينل ذاكرت النظري وجبت الA+ يعني هي سهله صراحة بس متعبة واحنا وقتنا من 3-5 كنا ننهلك بحق وحقيق .. اصبروا واصبروا واصبروا ..

مذاكرة النظري عندي بس قراءة وحفظ وفهم للمهم.. وبعدين تجميعات .. ركزوا على الأرقام  والنسب يجيبو منهم واااجد .. الا مايحفظوا بسرعة وكان وقت مذاكرتكم للفاينل زينا بس يوم تحتاجوا تقروها قبل لو عندكم وقت .. لان وقتنا كان يوم واحد وصراحة بالغصب خلصت المادة لان ماقريتها من قبل .
عملنا برزتيشن بالعربي .. وسوينا حملة توعوية :

وأنقذنا مصطفى " ماجد يا شعبة أربعة ":

النظام الاجتماعي بالإسلام :

نفس العقيدة بسيط وحلو .. القسم متعاون .. حفظنا باقي جزء عم .. الأسئلة سهله بس طويل وحفظ وفي كلام ماله داعي بس انو يعني مايعتبر شيء قدام البقية بس ذاكرو عدل بالفاينل والميدترم ولا تلعبوا واعطوا الشيء قدره من الوقت عشان تاخذو فيها كامل ..

توزيع الدرجات زي العقيدة وكان عندنا قيمي :

وهالمرة فعلنا قيمة حب الخير وهذه  الصور :

مهارات الاتصال communication skills :

بعد هذا المادة كانت لأول مرة بسنتنا بالانقلش .. عليها 2 كردت بالمعدل ..

كانت الا تعطينا وياها شديدة وما تبغى  جوالات وكنت بنوعي ماحب الناس الا تعاملنا بهالطريقة فكرهت المادة شوي .. الكتاب كان صغير وفرق بينه وبين مهارات التعلم أفضل بواجد وتقدري تقري فيه الأشياء بسهولة .. الكويزات عبارة عن حالات واحنا نقول صح او غلط مع التبرير كتابة .. كانو بسيطين وكنا نسوي حفلة بالتعبير بس الحمد لله تعطينا المس كامل .. المشاركة عليها خمس درجات " شاركو شوي عشان تعطيكم " لان بعض المسات مايعطوا أي احد كامل " زي مسنا " .. مذاكرتي لهذه المادة بالكويزات قراءة بس بالفاينل للامانة ماقدرت اخلص قراءة الكتاب لضيق الوقت .. قرأت السلايدات والكتاب اول الفصول والأخير قرأت منهم المهم .. الاختبار كان طويل جداً ويختلف عن الكويزات وفي بعض الأسئلة غلط وجابوا لنا نكتب كفر لتر .. طبعاً فيه عمل تطوعي في هذه المادة واسايمنت " سي في وكفر لتر " .

القسم جديد وعملوا بعض الدوشة بالاختبار الفاينل ان شاء الله انتو يكونو واضحين معاكم بس لا تشيلوا هم .. كل شيء يعدي " ثق بربك" .
عملنا برزنتيشن في هالمادة والمس قالت لنا بتتكلموا 5 دقايق وبالانقلش .. ولازم تسووا فن وتسوو مسرحية وخفنا شنسوي بعدين سوينا شيء مميز وبسيط عن " البشرة , the skin" المس اعجبت بأدائي واستانست مرا لأن مدحتني ".

بعض النصائح :

أنا اليوم وبعد ما انهيت سنتي الأولى أحب أنصحكم نصائح , ممكن ماكون أنا سويتها لكن لأني أحبكم  بكتب لكم بعض الأشياء النابعة من أعماق قلبي ..

أولا ً : بيقولون ليكم أول السنة إنكم في منافسة كبيرة والبقاء للأقوى .. " وهذا صحيح " لكن الا مو صحيح إنك تعامل غيرك على انه منافسك الا بياخذ كرسيك بالتخصص وتاكلوا في بعض وما تساعدوا بعض .. .. فنصيحتي الكبرى ليكم .. حبوا بعض وتمنوا الخير لبعض ونجاح غيرك مايعني فشلك .. بإمكان الجميع النجاح .

النقطة الثانية : لا تخلي أحد يقرر عنك سهولة الشيء من صعوبته , أنت الا تقرر هالشيء صعب أو سهل , اسأل الا اكبر منك عن طريقة الأسئلة وكيف نذاكر وماشابه لكن لا تعتمد انه يقولك صعب فهو صعب او سهل يعني سهل .. بس ذاكر من قلبك وتوكل وانت بعد الاختبار تقرر الشيء .

النقطة الثالثة : لا تهتم بدرجات غيرك بزيادة او حتى درجات الدفعة ككل .. هو صح انك تعرف مستواك طبيعي او نازل بس مو معناته انه الناس نازله أقوم استانس انه انا مثلهم .. هالشيء غلط الا عليك هو انك تراقب درجاتك انت وتشوف التقدم الا أنجزته وتحاول تزيد درجاتك .. لا تسمع للي يقولو هذه جامعة مافي فل مارك .. اسعى للأفضل واسعى لانك تجيب أعلى دائماً .

النقطة الرابعة :

في حالة انك نقصت وجبت درجة نزيلة فأحد الاختبارات .. الدنيا ما انتهت " لا تسوى منايح مثلي   " كل مرة عندك فرصة للتغير والعبرة في النهايات مدام السنة ما خلصت فلسى عندك فرصة للنجاح والوصول .." انتهزوا الفرص فإنها تمر مر السحاب " ..( وكل ما تريد منا الحياة هو العمل الشاق للحصول على النتائج المبهرة والمفرحة ؟ إذاً فلها ذلك ؟)

النقطة الخامسة :السنة التحضيرية لست أنا من يقرر صعوبتها أو سهولتها لكن .. من تجربتي أخبركم .. لقد واجهتني صعوبات وعقبات .. لقد مرت علي أيام صعبة .. لقد تعبت .. لقد بكيت .. لكنني وصلت .

يقول هانز سالي : " ليست الضغوطات هي التي تهلكنا بل هي ردة فعلنا تجاهها ".

هذه السنة سنة ضغوطات .. ضغط نفسي اكثر من كونه ضغط دراسي .. تفكيرنا بالمجهول والمستقبل .. أمور وأمور .. ولكن .. لا تفقد صبرك مهما تأخر عليك الفرج , فما بين حلمك وتحقيقه إلا صبر جميل ويكفي أن الصابرين توفى أجورهم بغير حساب .

في إحدى الصباحات وصلتني رسالة من أخت تقول : "عندك حلم ؟ أصحي كل يوم وفي بالك تحقيقيه ". ومن يومها صرت أروح الجامعة بعزم وأصرار أكثر من السابق .. وفي بالي حلمي وهدفي .

النقطة السادسة : أختار الصحبة الصالحة .. وما أجمل الانتقائية في كل شيء .. " الانتقائية تجعل منك شخص متفرد بمزيا الغير , فرد واحد بداخله عقول عدة عظيمة " انتقي أصدقائك .. انتقي كلماتك وحروفك ومكانتك واختار الصديق الذي يعينك ويقف بجانبك.

النقطة السابعة :جامعتنا جامعة لها كل يوم قرار .. فلا تعصبوا على القرارات وتزعلوا مثل ما كنت اسوي , بعد كل شيء جديد او تغير كنت اعصب وانقهر وطبعاً الفائدة ولا شيء.. قيل " لا تخشى من تدابير الخلق فأقصى ما يستطيعون فعله هو تنفيذ إرادة الله ".

النقطة الثامنة : في العمل الجماعي ممكن تصير بعض الحزازيات وهالأشياء لكن بالتعاون بينكم وبين بعض تخلصوا بدري .

وأخيراً " النقطة الأهم " .. اهتم بصلاتك وعلاقتك بربك وأمك وأبوك ورضاهم .. ولا تهجر القرآن لأنه به تنور عقولنا ونسمو في هذه الحياة .

ادعوا الله كثيراً .. قال تعالى (وَإِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ).

انتهز ساعات الإجابة .. لايرد القضاء إلا الدعاء.

نهاية السنة التحضيرية :قد تكون الأيام الأخيرة هي الأصعب بالنسبة لي .. فراق أصحاب داموا معنا مايقارب ال 8 شهور ..
كنت شديدة التعلق بالأشخاص والأماكن ولأن السنة قاربة على الانتهاء كنت سعيدة وحزينة في ذات الوقت ..حزينة لفراقهم وسعيدة لان الحلم بات قريباً..
فترة الفاينل " الترم الثاني ":

تحتاج صبر .. لا تيأسوا أو تتخاذلوا على آخر السنة .. ظلوا تقاتلوا علشان حلمكم لآخر ثانية .
وهذه بعض ذكرياتي :

فترة النتائج والتخصصات :
فترة انتظار وترقب ..
كل ما يحدث بعد هذه السنة بيد الله سبحانه وتعالى ..
كل من اجتهد وثابر لن يضيع الله له تعبه ..
جميع التخصصات في المسار الصحي جميلة وأنت فيها تقدم مساعدتك للمرضى وترضي ربك .. من بين الالاف الطلاب والطالبات الا تخرجوا معاك .. أنتوا يال 500 او 400 طالب او طالبة انقبلتوا بالمجال الصحي .. الله سبحانه وتعالى اختاركم لهالمهمة الإنسانية .. جميع الممارسين الصحين تحت أيديهم أرواح .. جميعهم بذلوا عمرهم لأحياء هذه الأرض .. قال تعالى " فمن أحياها فكأنما أحيا الناس جميعاً " .

ختاماً ..

حدد هدفك ,
تفاءل,
ارضَ,
وثقها ضمن قاموس حياتك ولا تهمش هدفاً كرست عمرك له

وهذه تجربتي انتهت ..أتمنى اني افدتكم ولو بالقليل ..

وأنا اليوم بحمد الله وفضله كما أردت رسمياً طالبة سنة ثانية في كلية الصيدلة الاكلينيكية .

أي سؤال.. تقدرو تسألوني آسك أو تويتر
DM

i_sara1997@
ask.fm/Sarahaon